لا اعلم كم منكم .. مرتبط بالاذاعة و بالبرامج الاذاعية …
فانا من جيل تربى على الاذاعة ايام ما كانت بخير .. بداية من ستة الصبح .. مع تمارين الصباح .. فى البرنامج العام.. و بعدين النشرة بتاعة سبعة .. واذا كنت صاحى بدرى قبلها يبقى لازم سمعت نشرة البى بى سى .. و راديو مونت كارلو .. و صوت امريكا قبل ما يبقى راديو سوا..
و مرورا بهمسة عتاب … و كلمتين و بس ..
و ..
و لو كملت حاسمع لكم البرامج الاذاعية للبرنامج العام و الشرق الاوسط .. و صوت العرب و اذاعة القرأن الكريم و مونت كارلو .. والبى بى سى .. والبرنامج التانى و الاوروبى….و..وو… مش حاخلص ..
الاذاعة كان لها مكان فى حياتى .. وخصوصا بالليل .. لانى كائن ليلى .. انشط ليلا …. واذاكر ليلا … واكتب ليلا ..
حتى فى الشغل .. باحب شغل الليل … لانه فيه تركيز أكثر …
و بالنسبة لى .. المريض اللى ينزل من بيته بالليل .. او و الجو مطر .. هو مريض حقيقى … (لان نسبة المتمارضين .. كبيرة جدا بالنهار..عموما) و طبعا بالليل .. لازم الراديو
و كان فيه فترة .. قبل ما يبقى الاذاعات كلها 24 ساعة كان كله بيقفل .. و يفضل البرنامج العام .. و نبدا من الساعة واحدة .. .. نشرة واحدة ونص .. وبعدين قال الفيلسوف .. و كان من الساعة اتنين يبدأ برنامج سمار الليالى ..
كان اشبه بمدونة سمعية … كل يوم يبقى ضيف .. و ينقى اغنية على مقطع من مسلسلة أو مسرحية .. و يربط بينهم بكلامه .. طبعا الضيوف سياسة على ادب .. على تحف ..
البرنامج ده علمنى .. احكم على البشر .. منفكرهم .. ومفضلاتهم .. ومن بيسمع ايه و بيعجبه ايه ..

كم نحن فى حاجة الى سمار الليالى .. الجدد فى عصرنا هذا …..
خاطرة ملهاش أى لازمة .. بس حبيت اشاركم فيها